Tími ofurfyrirsætunnar er liðinn!

Fyrirsætan Claudia Schiffer segir að tími ofurfyrirsætunnar sé liðinn. Hin 37 ára gamla fegurðardís segir, í samtali við tímaritið Fivetonine, að fyrirsætur í dag nái ekki sömu hæðum og áður. Í dag eru það frekar söng- og leikkonur sem fara á forsíður tímarita.

"Til að verða ofurfyrirsæta þarftu að vera á forsíðum allra helstu tímarita um allan heim á sama tíma," segir Schiffer. " Í dag er það ekki hægt þar sem auglýsingaiðnaðurinn stílar inn á poppstjörnur og leikkonur. Það er til svo mikið af fallegum fyrirsætum en það er nær útilokað fyrir þær að ná jafn langt og við gerðum. Í mínum huga er brasilíska fyrirsætan Gisele Bundchen eina ofurfyrirsætan í dag."

Á níunda áratugnum voru fyrirsætur á borð við Lindu Evangelistu, Cindy Crawford, Naomi Campbell og svo Schiffer allar skilgreindar sem ofurfyrirsætur og var varla til það mannsbarn sem ekki vissi hverjar þær voru.

"Ég man þá tíð þegar ég þurfti fjóra lífverði til að komast út í bíl eftir Chanel sýningu," segir Schiffer. "Þetta er ekki svona lengur," bætir hún við.