Sambandið á enda

Leikkonan Denise Richards og Richie Sambora, gítarleikari Bon Jovi, er hætt saman eftir eins árs ástarsamband. Vinur parsins fyrrverandi segir að þau hafi hætt saman fyrir tveimur mánuðum en hafi ekki viljað láta fjölmiðla vita af sambandsslitunum.

„Þau vildu ekki gera skilnaðinn opinberan vegna þess að þau gengu bæði í gegnum skilnaði fyrir opnum tjöldum sem var afar erfitt fyrir þau,“ sagði vinur þeirra.

Richards, sem er 36 ára, og hinn 47 ára Sambora byrjuðu saman í apríl í fyrra aðeins nokkrum mánuðum eftir að þau sóttu um skilnaði við maka sína, Charlie Sheen og Heather Locklear. Vakti sambandið mikla athygli, sérstaklega vegna þess að Richards og Locklear höfðu verið góðar vinkonur, en þær talast ekki lengur við. Hélt Richards því reyndar fram nokkru síðar að hún hefði slitið vinskap sínum við Locklear áður en hún byrjaði með Sambora.

Þrátt fyrir skilnaðinn var Richards viðstödd jarðarför föður Sambora í síðasta mánuði en hann hafði lengi barist við lungnakrabbamein.