Níu mánaða fangelsi fyrir nærfatahnupl

Karlmaður á þrítugsaldri var í Héraðsdómi Reykjavíkur í dag dæmdur í níu mánaða fangelsi fyrir búðarhnupl.

Maðurinn var ákærður fyrir að hafa stolið fimm nærbuxum í pakka og einum bol í verslun Hagkaupa í Kringlunni, samtals að verðmæti tæplega þrjú þúsund krónur.

Maðurinn játaði brotið en hann átti að baki allnokkurn sakaferil. Með brotinu rauf hann skilorð dóms sem hann hlaut í fyrra og var sá dómur því tekinn upp og dæmdur með þessu máli. Með hliðsjón af sakaferli og aldri ákærða þótti níu mánaða óskilorðsbundið fangelsi hæfileg refsing.