Kostar allt að 300 milljarða að setja allar raflínur í jörð

Samtök atvinnulífsins segja að ef þingsályktunartillaga sem liggur fyrir Alþingi um að leggja raflínur sem eru ofan jarðar í jörð á næstu árum og áratugum muni flutningskostnaður raforku margfaldast og reikningurinn verði sendur til íslenskra fyrirtækja og heimila.

Á vef samtakanna er bent á að þingmenn úr öllum flokkum standi að tillögunni sem felur í sér að ríkisstjórnin skipi nefnd til að móta stefnu um hvernig leggja megi á næstu árum og áratugum raflínur í jörð sem nú eru ofan jarðar. Segja samtökin að miðað við núverandi aðstæður og fyrirliggjandi tækni gæti kostnaðurinn við þetta hlaupið á yfir þrjú hundruð milljörðum króna.

„Verði það almenn stefna að leggja skuli raflínur í jörð mun flutningskostnaður raforku á Íslandi margfaldast og reikningurinn sendur til íslenskra fyrirtækja og heimila. Það mun hindra stofnun nýrra fyrirtækja og draga úr hvata til nýsköpunar auk þess að draga úr lífsgæðum landsmanna. Flutningskostnaður raforku er nú þegar tvöfalt hærri á Íslandi en á Norðurlöndunum, samkvæmt upplýsingum Landsnets, sem skýrist af miklum fjárfestingum og uppbyggingu á undanförnum árum," segir á vef Samtaka atvinnulífsins.

SA telja það jafnframt forgangsmál að fjarskipti fólks og fyrirtækja á landsbyggðinni verði bætt svo atvinnulíf þar geti setið við sama borð og fyrirtæki á höfuðborgarsvæðinu og í næsta nágrenni þess.