Sigrún Ósk nýr ritstjóri Skessuhorns

Sigrún Ósk Kristjánsdóttir hefur verið ráðin ritstjóri Skessuhorns frá og með áramótum og tekur við starfinu af Magnúsi Magnússyni útgefanda.

Magnús er ekki á förum frá fyrirtækinu heldur mun hann verða aðstoðarritstjóri, sinna skrifum og ýmsum verkefnum við rekstur fyrirtækisins eftir því sem segir á vef héraðsfréttablaðsins.

Sigrún Ósk er uppalin á Akranesi, fædd árið 1980. Hún hóf sinn blaðamannsferil á Skessuhorni árið 1999 og hefur síðan unnið við dagskrárgerð hjá Sjónvarpinu og sem blaðamaður á Fréttablaðinu. Hún er nú að ljúka BA-ritgerð í heimspeki, hag- og stjórnmálafræði frá Háskólanum á Bifröst.