Mamma vill að Kalli Bjarni afpláni á Kvíabryggju

Sveinbjörg Karlsdóttir, móðir Idolstjörnunnar Kalla Bjarna, sem dæmdur var í tveggja ára fangelsi í gær fyrir að reyna að smygla tveimur kílóum af kókaíni til landsins í sumar, segist vera afar sátt við dóminn enda óttaðist hún að hann yrði jafnvel mun lengri.

"Ég er afar sæl með dóminn og lít svo á að hann Kalli Bjarni minn sé að fá annað tækifæri. Ég óttaðist að dómurinn yrði mun lengri en sem betur fer þá var hann aðeins tvö ár," segir Sveinbjörg í samtali við Vísi.

Hún segir að Kalli Bjarni hafi staðið sig eins og hetja frá því að hann "hljóp á vegginn" eins og hún orðar það. "Hann hefur ekki snert fíkniefni síðan hann var tekinn. Hann vinnur eins og skepna bæði dag og nótt til að borga upp skuldir sem hann hefur safnað og þótt hann nái því kannski aldrei að verða skuldlaus þá verður að taka viljann fyrir verkið," segir Sveinbjörg.

Tíminn frá því að Kalli Bjarni var tekinn með tvö kíló af kókaíni í Leifsstöð hefur verið afskaplega erfiður fyrir alla fjölskylduna en Sveinbjörg segir það gleðilegt að nú sjái fyrir endann á þessu. "Hann þarf að borga skuld sína við samfélagið og síðan getur hann haldið áfram," segir Sveinbjörg.

Hún vonast til að sonur sinn fái að afplána dóminn á Kvíabryggju enda sé þar langt um betra andrúmsloft heldur en á Litla-Hrauni. Ekki er þó enn ljóst hvar Kalli Bjarni mun verða staðsettur í betrunarvistinni.

Sveinbjörg hefur staðið eins og klettur við hlið sonar síns í erfiðleikum hans. Hún þekkir líka ekki annað því dóttir hennar hefur einnig átt við fíkniefnavanda að etja. "Þau eru bæði hrein núna og ég get ekki verið annað en sátt. Þetta verða fyrstu jólin í ansi mörg ár þar sem bæði börnin eru edrú og það er yndislegt."