Óvíst hvort ráðuneytið mismuni kynjunum

„Kjarakönnun Félags háskólamenntaðra starfsmanna stjórnarráðsins gefur ekkert tilefni til fullyrðinga um launamun karla og kvenna sem vinna í félagsmálaráðuneytinu," segir Hrannar B. Arnarsson, aðstoðarmaður félagsmálaráðherra.

Greint var frá því í fréttum í gær að könnunin benti til þess að félagsmálaráðuneytið greiddi konum lægri laun en körlum. Hrannar bendir á að þátttakendur í könnuninni hafi verið of fáir til þess að hægt sé að greina kynbundin launamun út frá henni. „Ráðherra vinnur hörðum höndum að því að vinna bug á launamisrétti hvar sem það fyrirfinnst," segir Hrannar.

Ólafur Grétar Kristjánsson, formaður Félags háskólamenntaðra starfsmanna stjórnarráðsins tekur undir með Hrannari. „Ég hafði verið að vonast eftir því að 80% myndu svara könnuninni en einungis 63% svöruðu þegar uppi var staðið. Þar af voru aðeins 50% á meðal starfsmanna félagsmálaráðuneytisins," segir Ólafur. Ólafur segist ekki hafa neina ástæðu til að draga í efa að félagsmálaráðherra hafi áhuga á því að útrýma launamun.