Geiri á Goldfinger í mál vegna meiðyrða

Meiðyrðamál Ásgeirs Þórs Davíðssonar, eiganda strippklúbbsins Goldfinger gegn ritstjórum og blaðamönnum Vikunnar og Ísafoldar og viðmælenda Vikunnar verður tekið fyrir í Héraðsdómi í dag. . Ásgeir krefst þess að ummæli sem voru höfð um hann í greinunum séu dæmd dauð og ómerk. Þá krefst hann tæpra fimm milljóna í skaðabætur auk málskostnaðar og 800 þúsund króna til að kosta birtingu dóms í málinu í þremur dagblöðum.

Málið snýst um viðtal við Lovísu Sigmundsdóttur, fyrrverandi nektardansmær, sem birtist í Vikunni í ágúst síðastliðinn og grein í Ísafold um nektardansstaði.

,,Mér finnst hundleiðinlegt að þetta hafi þurft að fara svona." sagði Ásgeir, og bætir því við að hann sé seinþreyttur til vandræða í þessum efnum. ,,Ég vil bara að menn leiðrétti það sem er skrökvað upp á mann."

Í viðtalinu í Vikunni lýsir Lovísa reynslu sinni af nektardansi, þar á meðal á Goldfinger. Hún segir að þar sé stundað vændi með fullri vitund Ásgeirs, og að mikil þrýstingur sé á dansstúlkurnar að stunda slíkt. Í greininni í Ísafold segir að flest bendi til þess að mansal sé stundað í Kópavogi, og að stúlkurnar séu nútímaþrælar án hlekkja.

Ásgeir vísar ásökununum alfarið á bug. Hann segist fúslega viðurkenna það að hann sé enginn skátadrengur, og að margir myndu fá vafalaust fá klígju sé hann að barma sér yfir illu umtali. Hann segir ýmislegt hafi verið skrifað um sig í gegnum tíðina, en fátt svo alvarlegt. Hann segir Ísafold hafa megnið af sínum upplýsingum frá dyraverði sem hann sagði upp störfum fyrir fjórum árum síðan. Hann hafi síðan þá verið óþreytandi við það að rægja Geira.

Elín Arnar, ritstjóri Vikunnar segir að Lovísa hafi talað almennt um reynslu sína af nektarstöðum í viðtali sínu við blaðið en henni finnist það einkennilegt að Geiri taki til sín persónulega allt það sem þar kemur fram ,,Maður spyr sig hvort það sé vegna þess að hann hafi eitthvað óhreint mjöl í pokahorninu."