Borgin skipar aðgerðahóp vegna PISA-könnunar

Menntaráð Reykjavíkurborgar ákvað á fundi sínum í gær að skipa sérstakan aðgerðahóp sem á að hefja viðræður við menntamálaráðuneyti, menntastofnanir og skólaþróunarsamtök til þess að styrkja kennsluhætti í þeim greinum þar sem íslenskir nemendur hafa dalað í alþjóðlegum samanburði.

Þar er vísað til nýrra niðurstaðna úr svokallaðri PISA-könnun en hún sýndi að frammistaða íslenskra nemenda hefði versnað á milli áranna 2000 og 2006 í lesskiningi, stærðfræði og náttúrufræði.

Í tilkynningu frá menntaráði segir enn fremur að óskað verði eftir því við Námsmatsstofnun að hún greini nánar árangur reykvískra grunnskólabarna í PISA-könnuninni. Í greiningunni á að koma fram staða sérhvers grunnskóla í borginni og samanburður við landið allt í öllum greinum.

Aðgerðahópur menntaráðs á einnig að skoða þarfir nemenda með íslensku sem annað tungumál og bráðgerra nemenda sérstkalega. Aðgerðahópurinn á að skila tillögum eigi síðar en 1. apríl 2008, en í honum munu sitja auk fræðslustjóra og kjörinna fulltrúa, fulltrúar kennara, foreldra og skólastjóra.

Bent er á í tilkynningunni að reykvískum nemendum hefur hrakað mest í lesskilningi og eru þeir nú í meðallagi miðað við jafnaldra sína á landinu öllu. Það sé þó einungis í elstu bekkjum grunnskólans sem lestrarfærni hrakar marktækt og því þurfi að skoða kennsluhætti þar sérstaklega. Þá bendi niðurstöðurnar til þess að skoða þurfi kennsluhætti, námsefni og aðstöðu til verklegrar kennslu í náttúrufræði.