Saug upp eitur og vill miskabætur

Þrjátíu og tveggja ára gamall karlmaður hefur stefnt Samskipum vegna vinnuslyss sem hann varð fyrir þann 10. ágúst 2005. Þá var maðurinn við vinnu í þvottastöð Samskipa við Holtabakka.

Maðurinn var að reyna að ná olíuhreinsi í dælu, svo hægt væri að hreinsa vinnutæki sem Samskip notar. Dælan var biluð og reyndi maðurinn að koma dælunni í gang með því að taka slöngu fyrir ofan hana í sundur og sjúga vökvann upp í dæluna. Ekki vildi betur til en svo að þegar maðurinn var að ganga frá dælunni sprautaðist úr henni og ofan í manninn. Hann fann strax fyrir verulegum verkjum og var fluttur á spítala. Maðurinn hlaut varanlegan skaða í lungum og var metinn með 10% varanlega örorku eftir slysið.

Maðurinn krefst ríflega sex milljóna króna í skaðabætur. Fyrirtaka var í málinu i Héraðsdómi Reykjavíkur í dag.