Sögðu ríkisstjórnina svelta heilbrigðiskerfið til einkavæðingar

Þingmenn Vinstri - grænna og Framsóknarflokksins gagnrýndu ríkisstjórnina fyrir að svelta heilbrigðiskerfið með það fyrir augum að greiða fyrir einkavæðingu í kerfinu. Stjórnarliðar sögðu hins vegar að verið væri að vinna upp gamlar syndir framsóknarráðherra.

Siv Friðleifsdóttir, þingkona Framsóknarflokksins og fyrrverandi heilbrigðisráðherra, kvaddi sér hljóðs í upphafi þingfundar og sagði að það þyrfti að stórskerða þjónustu í heilsugæslunni og á Landspítalanum miðað við hugmyndir ríkisstjórnarflokkanna um framlög til þessara liða á næstu ári.

Vísaði hún til sparnaðartillagna hjá heilsugæslunni sem fjallað hefur verið um í fjölmiðlum að undanförnu. Þá sagði hún Ástu Möller, þingkonu Sjálfstæðisflokksins, hafa skammað stjórnendur heilsugæslunnar fyrir að benda á sparnaðarleiðir en orð hennar staðfestu þann grun að það ætti að gera grundvallarbreytingar á heilbrigðiskerfinu eins og forsætisráðherra hefði talað um. Svelta ætti heilbrigðiskerfið fyrir einkavæðingu.

Guðlaugur Þór Þórðarson heilbrigðsráðherra vakti athygli á því að Siv Friðleifsdóttir hefði stigið upp úr stól heilbrigðisráðherra fyrir sex mánuðum en talaði nú um grundvallarbreytingu á heilbrigðiskerfinu. Hann sagði fáránlegt að tala um 550 milljóna króna sparnað hjá heilsugæslunni sem ekki yrði ráðist í.

Þá væri það fáránlegt að tala um að hér ætti að taka upp amerískt kerfi með því að nýta kosti einkarekstursins. Það væri nú þegar einkarekstur í kerfinu, heilsugæslan í Salahverfi, Art Medica og Orkuhúsið væru dæmi um það. Ráðist hefði verið í þær breytingar í tíð framsóknarmanna í heilbrigðisráðuneytinu. Það hefði ekkert breyst.

Ögmundur Jónasson tók undir með Guðlaugi Þór að ekkert hefði breyst. Á síðustu árum hefðu framlög til Landspítalans verið skorin niður að raungildi og nú sé svo komið að stjórnendur spítalans geti ekki hagrætt meira. Það þyrfti hið minnsta 800-1000 milljónir til að halda óbreyttri starfsemi spítalans á næsta ári. Ögmundur sagði Ísland standa á pólitískum tímamótum. Niðurskurður í heilbrigðismálum væri af pólitískum rótum til þess að greiða götur einkareksturs. Ætlunin væri að koma á fót verslunarmiðstöð fyrir sjúkdóma með nýju frumvarpi heilbrigðisráðherra og lofaði hann löngum og ítarlegum umræðum um það.

Ásta Möller, þingkona Sjálfstæðisflokksins, sagði þær hugmyndir að skera niður skóla- og heimahjúkrun gengju gegn stefnu stjórnvalda sem hygðust þrefalda framlög til heimahjúkrunar á næstu þremur árum. Full þörf væri hins vegar á að endurskoða rekstur heilsugæslunnar því hún væri of miðstýrð. Sagði Ásta það koma á óvart að Siv Friðleifsdóttir liti svo á að heilsugæslan í Salahverfi væri ávísun á amerískt kerfi.

Ágúst Ólafur Ágústsson, varaformaður Samfylkingarinnar, sagði vandann í málinu snúast um uppsafnaðan halla Landspítalans og heilsugæslunnar frá fyrri árum í tíð Framsóknarflokksins. Ríkisstjórnin nú ætlaði að verja 500 milljónum króna aukalega til heilsugæslunnar, þrefalda fjármagn til heimahjúkrunar á þremur árum og efla geðheilbrigðisþjónsutu barna og unglinga.