Íbúar hafa ítrekað kallað eftir umbótum

Formaður Væntumþykju, félags íbúa í Hátúni, segir að félagið hafi ítrekað kallað eftir auknu eftirliti með íbúum blokkarinnar sem margir hverjir séu veikir og lifi einangruðu lífi. Hann segir ekkert hafa gerst í málunum en tvö ár eru síðan félagið lagði til að sérstöku teymi yrði komið á. Kona fannst látin í Hátúni 10 á miðvikudaginn en talið er að hún hafi dáið viku fyrr. Hafþór Baldvinsson, formaður félagsins, segir að svipað atviki hafi átt sér stað síðasta vetur.

„Þetta er fyrst og fremst hörmulegur atburður," segir Hafþór í samtali við Vísi. „Félagið hefur starfað í tvö ár og við höfum frá upphafi óskað eftir samstarfi við Öryrkjabandalagið, hússjóðinn Brynju og Félagsþjónustuna um þessi mál," segir Hafþór og bætir því við að lítið hafi þokast í málunum. „Við lögðum til að komið yrði á sérstöku teymi með aðilium frá Félagsþjónustunni, heimahjúkrun, ÖBÍ, Brynju og jafnvel fólki frá okkur í Væntumþykju þar sem farið yrði yfir þessi mál ítarlega."

Sigursteinn Másson, formaður Öryrkjabandalagsins, harmaði atburðinn í samtali við Vísi í gær og þar kom fram að svipað atvik hafi síðast komið upp fyrir tveimur árum síðan. Þetta segir Hafþór ekki rétt. „Mér vitanlega er enn eitt dæmi í millitíðinni en þá lést hér einstaklingur sem fannst ekki fyrr en nokkru síðar. Þá var þó ekki um jafn langan tíma að ræða og í þessu tilviki sem betur fer," segir Hafþór. Hann segir það atvik hafa átt sér stað síðasta vetur.

Hafþór segir að Félagsþjónustan hafi sýnt þessum málum áhuga og verið með svokölluð innlit til sinna skjólstæðinga alla daga vikunnar. Vandamálið sé hins vegar að aðeins um helmingur íbúanna njóti aðstoðar frá Félagsþjónustunni. „Hinir sitja því eftir," segir Hafþór. Hann segist ekki vita hvort konan sem um ræðir í þessu tilviki hafi notið aðstoðar en segir hana hafa verið duglega og sjálfstæða þrátt fyrir að hún hafi glímt við líkamlega fötlun.

„Þetta er raunar mjög vandmeðfarið mál því annars vegar togast á heilbrigðissjónarmið og friðhelgi einkalífsins.Hér í húsinu eru innanum mjög veikir einstaklingar. Flestir sjá um sig sjálfir en aðrir geta það engan veginn. Svo er til í dæminu að fólk vill ekki heimaþjónustu þrátt fyrir að eiga kost á henni," segir Hafþór.

Að mati Hafþórs þarf einnig að huga betur aðíbúasamsetningunni í Hátúni. „Ég tel að hér búi innanum allt of veikir einstaklingar sem kerfið vísar nánast á götuna og þá eru þessi hús notuð. Þetta eru einstaklingar sem ættu að vera í umsjá heilbrigðiskerfisins en ekki að búa hér," segir Hafþór Baldvinsson, formaður Væntumþykju að lokum.