Biskup biðst ekki afsökunar

Biskup Íslands, Karl Sigurbjörnsson, hefur svarað Siðmennt en félagið krafði hann um afsökunarbeiðni vegna ummæla sem biskup lét falla í 24 Stundum á dögunum. Biskup hefur nú sent Siðmennt opið bréf um hæl þar sem segir meðal annars að félagið hafi undanfarið gengið hart gegn kirkju og kristni með „einstrengislegum málflutningi og kröfum um boð og bönn."

Þá segir biskup að félagið hafi sent frá sér bréf og yfirlýsingar, til dæmis til yfirvalda menntamála, „þar sem amast er við m.a. skoðunarferðum í kirkjur, að börn séu látin „lita eða teikna trúarlegar myndir" og „tryggt verði að greinarmunur sé gerður á sagnfræði og goðsögnum í kennslustundum.""

Að mati biskups hafa ýmsir talsmenn Siðmenntar hafa leyft sér þann málflutning að tala niðrandi um trú og að krefjast banns við helgileikjum og jólaguðspjalli í skólum. „Ég leyfi ég mér að nota orðið „hatrammur" um þennan málflutning," segir Karl Sigubjörnsson.

„Í tillögum sem Siðmennt lagði fram á fundi Menntaráðs Reykjavíkur í febrúar 2005 segir: „Í stað þess (leturbreyting KS) að einskorða kennslu við kristnifræði er heillavænlegt að kenna almenna siðfræði, heimspeki og gagnrýna hugsun."", segir biskup um leið og hann fagnar því ef „Siðmennt vill nú styðja kristinfræðikennslu og trúarbragðafræðslu í skólum, eins og fram kemur í opnu bréfi félagsins til mín. Það er sannarlega gleðilegt ef Siðmennt vill taka þannig höndum saman við Þjóðkirkjuna. Aldrei var brýnna en nú andspænis vaxandi fjölmenningu að efla slíka fræðsla í skólunum og að auka menntun kennara í þessum efnum."

„Ég legg mikla áherslu á að trúarbragðafræðsla, kristinfræði og fræðsla um ólík lífsviðhorf fari fram á faglegum forsendum skólans og að fyllsta tillit sé tekið til mismunandi lífs- og trúarskoðana af virðingu og umburðarlyndi. Það gerist ekki með því að útiloka hinn trúarlega þátt og kærar hefðir eins og hatrammlega hefur verið kallað eftir í umræðunni undanfarið," segir Karl Sigurbjörnsson, biskup Íslands, að síðustu.

Bréf biskups má lesa í heild sinni hér fyrir neðan.