Lyf ekki eins og hver önnur vara

Lyfjafræðingafélag Íslands geldur varhug við hugmyndum sem viðraðar hafa verið á síðustu dögum um að sala lausasölulyfja verði heimiluð í almennum verslunum. Með því sé horft fram hjá öryggissjónarmiðum því lyf séu ekki eins og hver önnur vara.

Unnur Björgvinsdóttir, formaður Lyfjafræðingafélags Íslands, undrast umræðu síðustu daga um breytingar á lagaumhverfi lyfjaverslunar í því augnamiði að lækka lyfjaverð.

Með því að leggja til að farið verði að selja lausasölulyf í verslunum sé horft fram hjá öryggissjónarmiðum varðandi lyf. „Þetta er ekki eins og hver önnur vara og það er ástæða fyrir því að lyfjalög voru sett. Það er afar mikilvægt að fólk fái leiðbeiningar um hvernig nota eigi lyf rétt," segir Unnur. Með því að leyfa lyfjasölu í almennum verslunum aukist líkurnar á lyf séu notuð á rangan hátt og í röngu magni. Bendir Unnur á að aðeins þurfi 20 töflur af parasetamóli til þess að eyðileggja lifrina.

Unnur segir að danska lyfjafræðingafélagið hafi vaxandi áhyggjur af sölu lyfja í almennum verslunum en þar hefur slík sala verið heimiluð í sex ár. „Við fáum fréttir frá þeim af aukinni notkun verkjalyfja hjá börnum og unglingum, lyfjum sem geta verið hættuleg heilsunni ef þau eru ekki notuð rétt," segir Unnur. Í tilkynningu frá Lyfjafræðingafélaginu er bent á að á þessum sex árum hafi innlagir barna á sjúkrahús í Danmörku vegna parasetamól- og acetýlsalisýlsýrueitrunar meira en tvöfaldast.

Unnur spyr enn fremur hvert sé markmið umræðunnar. Um það hafi verið rætt að undanförnu að fækka þurfi apótekum í landinu til þess að draga úr dreifingarkostnaði og lækka þannig lyfjaverð. „Nú er hins vegar talað um að það eigi að fjölga sölustöðunum og þá eykst dreifingarkostnaðurinn og þá teljum við að lyfjaverð muni hækka," segir Unnur.