Skaddaði sjón manns varanlega í líkamsárás

Héraðsdómur Reykjavíkur dæmdi í dag karlmann í átta mánaða fangelsi fyrir stórfellda líkamsárás sem leiddi meðal annars til þess að sjón fórnarlambsins skaddaðist varanlega.

Atvikið átti sér stað í miðbæ Reykjavíkur í febrúar í fyrra og var hinum ákærða gefið að sök að hafa slegið fórnarlamb sitt nokkrum sinnum í andlitið þannig að fórnarlambið nefbrotnaði, hlaut glóðarauga auk þess sem brot kom í vinstri augnbotn. Leiddi það meðal annars til langvarandi sjónskerðngar og varanlegrar tvísýni eftir því sem fram kemur í dómnum.

Árásarmaðurinn viðurkenndi að hafa slegið fórnarlamb sitt og bar við sjálfsvörn. Hann viðurkenndi þó að hann hefði gengið fullharkalega fram í atlögu sinni. Út frá framburði fórnarlambsins og vitnis þótti dómnum hins vegar sannað að ákærði hefði ráðist að fyrra bragði á fórnarlamb sitt og veitt því áverkana.

Segir dómurinn árásina því tilefnislausa og að hún hafi leitt til varanlegs sjónskaða fyrir fórnarlambið, en það þurfti að gangast undir endurteknar aðgerðir til að lagfæra tvísýni og innfallið auga. Segir dómurinn að ákærði eigi sér engar málsbætur og að árásin hafi verið harkaleg. Var ákveðið í ljósi þessa að skilorðsbinda ekki refsinguna en maðurinn, sem ákærður var, hafði aldrei áður komist í kast við lögin.