Guðmundur Bjarnason ennþá landlaus

Þjóðskrá hefur enn ekki breytt ákvörðun sinni varðandi Guðmund Bjarnason öryrkja, en hann var sviptur lögheimili hér á landi í febrúar síðastliðnum. Umboðsmaður Alþingis sendi Þjóðskrá bréf og bað um skýringar á því hvers vegna Guðmundi væri ekki svarað. Var Þjóðskrá gefinn svarfrestur til 2. nóvember en ekkert gerist.

„Ég stend ráðþrota í þessari stöðu," segir Guðmundur. Þjóðskrá tók ákvörðun um lögheimilisbreytinguna í febrúar á þessu ári og síðan þá hefur hann verið án þeirra réttinda sem öryrkjar hafa hér á landi. Hann fær ekki greiddan sjúkrakostnað og fær ekki niðurgreidd lyf. Hann fær heldur ekki öryrkjabætur. „Dagur B. Eggertsson er búinn að fylgjast með mínu máli frá upphafi. Þegar hann varð borgarstjóri sendi ég honum tölvupóst og benti honum á að nú væri hann í aðstöðu til að greiða úr mínum málum. Hann vísaði mér þá á Björk Vilhelmsdóttur, nýjan formann velferðarráðs," segir Guðmundur og bendir á að þótt mörgu fögru hafi verið lofað, sé enn lítið um efndir. „Ég er að biðja borgina um neyðaraðstoð en samt tekur þetta svona langan tíma," segir Guðmundur og er algerlega í öngum sínum.

Þegar Vísir hafði samband við Skúla Guðmundsson, skrifstofustjóra Þjóðskrár, í síðustu viku, sagði hann að Guðmundi yrði svarað fyrir lok dags 16. nóvember. Guðmundur segist enn ekki hafa fengið svar. Hjá Umboðsmanni Alþingis fengust þau svör að embættið myndi ekki tjá sig um málefni einstaklinga.

„Þetta snýst um miklu meira en bara það að Þjóðskrá svari einhverju erindi. Þetta snýst um afkomumöguleika Guðmundar. Hann er sviptur öllum möguleikum til að sjá fyrir sér," segir Lára V. Júlíusdóttir, lögmaður hans. Hún segist ekki skilja hvers vegna Þjóðskrá dragi það að svara erindi sínu en fjórir mánuðir er síðan hún fyrst bað Þjóðskrá um að endurskoða ákvörðun sína.