Sveitarfélög sýni samstöðu í kjaramálum

Halldór Halldórsson, formaður Sambands íslenskra sveitarfélaga, segir samstöðu sveitarfélaga í kjaramálum mikilvægari en flest annað, ekki síst nú þegar mikil þensla er í atvinnulíifnu í sumum landshlutum en öðrum ekki. Þetta kom fram í ræðu hans á fjármálaráðstefnu sambandsins sem hófst í morgun.

Halldór benti á að sveitarfélögin gegndu ábyrgðarmiklu hlutverki í þjóðfélaginu á ýmsum sviðum, þar á meðal í vinnuveitendamálum. Kjara- og starfsmannamál væru vandmeðfarin og á þeim eru margir fletir, ekki síst nú þegar mikil þensla væri í atvinnulífinu í sumum landshlutum en öðrum ekki.

Vill endurskoðun á tekjustofnum sveitarfélaga

Benti Halldór á að ríkissjóður hefði á undanförnum árum verið rekinn með myndarlegum tekjuafgangi en sama mætti ekki segja um sveitarfélögin sem mörg hver glímdu við miklar skuldir. Benti hann á að sveitarfélögin hefðu farið fram á hlutdeild í fjármagnstekjuskatti en því hefði ríkisstjórnin tekið fálega.

Hins vegar hefði kveðið við annan tón í ræðu Jóhönnu Sigurðardóttur á aðalfundi Samtaka sveitarfélaga á höfuðborgarsvæðinu á dögunum. Þar hefði Jóhanna sagt að sveitarfélögin hefðu ýmislegt til síns máls varðandi kröfu um hlutdeild í tekjuskatti. Sagði Halldór að með vísan til þessara orða hlytu sveitarfélögin að vænta þess að hafin yrði vinna við endurskoðun á tekjustofnum sveitarfélaganna. „Ekki stendur á okkur að hefja þá vinnu," sagði Halldór.

Þá benti hann á að tekjustofnar sveitarfélaga væri settir með lögum en að samræmi yrði að vera á milli tekna og lögskyldra og venjubundinna verkefna sveitarfélaganna. „Sú hefur ekki verið reyndin undanfarin ár eins og fram kemur í hallarekstri og skuldasöfnun sveitarfélaganna. Forsvarsmenn löggjafar- og ríkisvalds geta ekki litið fram hjá þeirri staðreynd. Við ætlumst til þess að nýskipað Alþingi og ný ríkisstjórn taki á þessum málum," sagði Halldór.

Halldór benti jafnframt á að sveitarfélögin yrðu að gæta aðhalds og útsjónarsemi í meðferð fjármuna. Þau þyrftu að sýna staðfestu og koma íbúunum í skilning um að ekki væri mögulegt að gera allt fyrir alla og allt í einu.

Orku- og veitufyrirtæki þjóni almenningi

Halldór vék jafnframt að orkumálum og sagði að sveitarfélögin ættu mörg hver öflug orku- og veitufyrirtæki. Þar hefði byggst upp mikil þekking sem reynt væri að nýta til útflutnings. Sveitarstjórnarmenn mættu þó ekki gleyma því að fyrst og fremst væru þessi verðmiklu fyrirtæki byggð upp til að þjóna almenningi hér heima.