Gistnóttum fjölgaði um fimm prósent í september

Gistinóttum á hótelum í september fjölgaði um rúmlega fimm þúsund eða fimm prósent miðað við sama mánuð í fyrra samkvæmt tölum Hagstofunnar. Þanni voru gistnæturnar rúmlega 121 þúsund í september í ár en 116 þúsund í fyrra.

Gistinóttum fjölgaði eingöngu á höfuðborgarsvæðinu og á Suðurlandi. Hlutfallslega varð meiri fjölgun á Suðurlandi þar sem hún nam tæpum 15 prósentum en á höfuðborgarsvæðinu fjölgaði gistinóttum um tæp átta prósent. 

Í öðrum landsvæðum fækkaði gistinóttum á hótelum í september milli ára. Samdrátturinn var mestur á Austurlandi en gistinóttum fækkaði úr 5.600 í 4.200, eða um fjórðung. Fram kemur á vef Hagstofunnar að fjölgun gistinátta á hótelum í september megi aðeins rekja til Íslendinga því gistinóttum útlendinga fækkaði um rúma prósentu.

Þegar horft er til fyrstu níu mánaða ársins fjölgaði gistinóttum á hótelum um 13 prósent á milli ára og eru þær nú komnar yfir eina milljón. Fjölgun varð á öllum landsvæðum, mest á höfuðborgarsvæðinu, 15 prósent, en minnst á Suðurnesjum, Vesturlandi og Vestfjörðum, eða fimm prósent.