Fangageymslur fylltust í nótt

Alls gistu sautján manns fangageymslur lögreglunnar á höfuðborgarsvæðinu í nótt og voru allar fangageymslur fullar. Mikill erill var hjá lögreglunni. Talsvert var um minniháttar slagsmál og pústra.

Einn var fluttur með sjúkrabíl á slysadeild Landspítalans eftir ryskingar við Stórhöfða í Reykjavík. Þá var lögregla kvödd að skemmtistað í Hafnarfirði til að stöðva slagsmál sem þar voru. Einn lögregluþjónn var sleginn í höfuðið þar en meiðsl hans urðu ekki alvarleg.

Þá lentu tveir bílar saman við gatnamót Hringbrautar og Bústaðarvegar. Ökumaður annars bílsins er grunaður um ölvun við akstur og verður skýrsla tekin af honum í dag.

Um þrjúleytið í nótt hafði lögregla afskipti af tveimur mönnum undir tvítugu við Þverás í Reykjavík. Þeir höfðu bakkað á kyrrstæða bifreið. Við athugun kom í ljós að þeir voru með mikið magn af áfengi í bifreið sinni sem þeir höfðu verið að selja jafnöldrum sínum. Drengirnir voru færðir á lögreglustöð þar sem foreldar þeirra sóttu þá, en áfengið var haldlagt.