Eiður Smári: Við létum Letta líta vel út

Landsliðsfyrirliðinn Eiður Smári Guðjohnsen var daufur í dálkinn eftir leikinn í dag. „Þetta lettneska lið er ekkert sérstakt. Þeir litu bara vel út því við gáfum þeim tækifæri til þess," sagði Eiður.

„Við eigum ekki að láta þá koma okkur á óvart. Við erum á heimavelli og sjálfstraustið á að vera í fínu lagi eftir tvo síðustu leiki. Við byrjuðum frábærlega síðan bara gefum við eftir á einhvern óskiljanlegan hátt."

„Ég þyrfti að setjast niður og horfa á leikinn til að finna einhver svör. Við gáfum þeim of mikið svæði. Sátum of aftarlega og svæðið milli varnar og miðju var of mikið, einnig svæðið milli miðju og sóknar. Því miður," sagði Eiður.

„Áherslurnar hjá okkur voru engan veginn í takt og þegar lið eru ekki samstillt þá gerast svona hlutir. Í landsleikjum er þér refsað fyrir minnstu mistök. Lettarnir hafa skorað úr öllum sínum færum í leikjum gegn okkur í þessari keppni. Það þýðir þó ekkert að kvarta yfir því, við erum að gefa þeim þessi færi."

„Við fáum á okkur tvö mörk úr hornspyrnum. Það á að vera einn helsti styrkur okkar í vörninni að verjast föstum leikatriðum."

Eiður Smári skoraði bæði mörk Íslands og um leið bætti hann markamet Ríkharðs Jónssonar. „Auðvitað er ég ánægður með að hafa skorað tvö mörk en þau fjúka bara út í vindinn þegar úrslitin eru þessi. Ég er stoltur af þessu meti en það er skuggi yfir því í dag þó ég eigi eftir að gleðjast yfir því í framtíðinni."

Eiður Smári vildi ekkert ræða um næsta leik íslenska landsliðsins. „Næstu klukkutíma ætla ég að kúpla mig út úr fótbolta. Ég ætla að eyða þessum nokkru klukkutímum sem við höfum í frí í kvöld með vinum mínum," sagði Eiður Smári.