Nýr sæstrengur til Danmerkur tilbúinn eftir rúmt ár

Til stendur að leggja sæstreng á milli Íslands og Danmerkur sem á að verða tilbúinn í lok næsta árs. Þetta kemur fram í tilkynningu frá samgönguráðuneytinu.

Þar segir að ríkisstjórn Íslands hafi á föstudag samþykkt tillögu Kristjáns L. Möller samgönguráðherra um lagningu sæstrengsins á milli Íslands og Danmerkur. Ný strengurinn færi nafnið Danice og á að vera viðbót við Farice 1 sæstrenginn sem tengir Ísland við Evrópu. Með strengnum vonast menn til þess að geta lokkað til landsins netþjónabú en rekendur slíkra búa hafa mikla áherslu á að nýr strengur verði lagður frá landinu til að auka örygi í gangaflutningum.

„Danmerkurleiðin hefur í för með sér styttri senditíma til mið- og austurhluta Evrópu og skapar æskilega nálægð við tengipunkta í Stokkhólmi og Amsterdam. Strengurinn mun jafnframt uppfylla kröfur netþjónabúa um flutningsgetu og aðra tæknilega þætti, segir í tilkynningu ráðuneytisins.

Það er Farice sem stendur fyrir lagningu strengsins en félagið er langt komið með rannsóknar- og tilboðsvinnu og er búið að tryggja sér framleiðslunúmer á ljósleiðarastreng og skip til lagningar.

Kostnaðurinn við lagningu Danice nemur 5 milljörðum króna sem einum og hálfum milljarði króna meira en fyrri áætlanir gerður ráð fyrir, en þar var miðað við streng til Bretlandseyja. Segir í tilkynningu samgönguráðuneytisins að nú þegar liggi fyrir drög að samningi við öfluga aðila, innlenda sem erlenda, um tengingu netþjónabús sem nægir e-Farice til að mæta auknum kostnaði við að fara Danmerkurleiðina. Greint verður frá því samkomulagi á næstu dögum.

Þá hafa orkufyrirtækin, Landsvirkjun, Orkuveita Reykjavíkur og Hitaveita Suðurnesja lýst sig tilbúin að koma að fjármögnun verkefnisins en með því munu þau eignast meirihluta í e-Farice ehf.

Eignarhaldsfélagið Farice ehf., er félag um hlut Íslendinga í Farice hf., sem er að 80% í eigu Íslendinga og 20% í eigu Færeyinga.