Fjórir sluppu ómeiddir frá strandi

Fjórir menn sluppu ómeiddir þegar hraðbátur þeirra steytti á skeri á milli Vatnsfjarðar og Mjóafjarðar við innanvert Ísafjarðardjúp á tíunda tímanum í gærkvöldi. Leki kom að bátnum og sendu skipverjar út neyðarkall. Síðan blésu þeir út gúmmíbjörgunarbát og fóru yfir í hann.

Kallaðar voru út björgunarsveitir, þyrla var komin í viðbragðsstöðu og Björgunarskipið Gunnar Friðriksson var lagt af stað frá Ísafirði, þegar þær fréttir bárust að búði væri að bjarga mönnunum yfir í annan bát og flytja þá heila á húfi í land á Nauteyri. Ferðamannabáturinn Sædís frá Bolungarvík kom svo á vettvang með bjrögunarsveitarmenn, sem komu böndum á bátnum og var báturinn svo dreginn til Ísafjarðar, þangað sem komið var með hann til hafnar klukkan fjögur í nótt á kafi.

Hann verður væntanlega hífður upp á bryggju í dag. Ekki liggur fyrir hvað fór úrskeiðis þannig að mennirnir sigldu á skerið, en lögregla tekur skýrslu af þeim í dag.-