Ríkisendurskoðun segir þjónustusamning ófullnægjandi

Þjónustusamningur heilbrigðis- og tryggingamálaráðuneytis við Sveitarfélagið Hornafjörð um heilsugæslu og öldrunarþjónustu getur ekki að öllu leyti talist fullnægjandi. Þetta er mat Ríkisendurskoðunar sem sent hefur frá sér skýrslu um málið. Engin gæða- og þjónustumarkmið hafa verið sett af hálfu Heilbrigðisstofnunar Suðausturlands og ráðuneytið hefur ekki þrýst á um að setja slík markmið.

Að mati Ríkisendurskoðunar er því óvíst hvort fjárhagslegum hagsmunum ríkisins sé betur varið með því að endurnýja þjónustusamninginn en ef ríkið annaðist reksturinn sjálft í framtíðinni. Þjónustusamningurinn var gerður árið 2003 og var hann í gildi til ársloka 2006. Í stjórnsýsluúttektinni kemur fram að samningurinn uppfylli þær formlegu kröfur sem gerðar hafa verið til slíkra samninga. „Engu að síður er lagt til að í nýjum samningi verði hlutverk aðila betur skilgreind og tilgreint hvernig árangur af honum skuli metinn," segir í tilkynningu frá Ríkisendurskoðun.

„Ríkisendurskoðun telur að Sveitarfélagið Hornafjörður hafi að mörgu leyti náð að laga framkvæmd þjónustusamningsins að staðbundnum aðstæðum. Þá hafi Heilbrigðisstofnun Suðausturlands eflt þjónustu sína á sviði heilsuverndar, heimahjúkrunar og öldrunarmála á samningstímanum. Ekki hafi hins vegar tekist að bæta stjórn sveitarfélagsins á þessum málaflokkum, auk þess sem þjónusta lækna hafi dregist saman. Í þessu samhengi ber reyndar að hafa í huga að þjónusta stofnunarinnar hefur nær eingöngu verið mæld út frá magni," segir í tilkynningunni og því bætt við að gæðin hafi enn ekki verið mæld á fullnægjandi hátt.

„Vegna ófullnægjandi mælinga á magni og gæðum þeirrar þjónustu sem Heilbrigðisstofnun Suðausturlands veitir telur Ríkisendurskoðun vandséð hvort markmið um bætta nýtingu opinbers fjár hafi náðst. Af þeim sökum sé óvíst hvort fjárhagslegum hagsmunum ríkisins sé betur borgið með nýjum þjónustusamningi en ef ríkið annaðist sjálft reksturinn," segir að lokum.