Lausamunir á fleygiferð í fyrstu haustlægðinni

Lausamunir hafa fokið víða um land en ekki er vitað um alvarleg óhöpp eða slys í þessari fyrstu alvöru haustlægð sem gengur yfir landið.

Vindhraði hefur víða farið í 25 til 30 metra á sekúndu í kviðum og á öllum fjallvegum hefur hann farið yfir 20 metra á sekúndu. Eftir hádegi verður mesti vindstyrkurinn á Norður- og Norðvesturlandi en veðrið gengur allstaðar niður í kvöld og verður veður tiltölulega hæglátt á morgun eða þar til ný lægð kemur.

Mikil hlýindi fylgja hvassviðrinu og mældist hiti til dæmis yfir 20 stig á nokkrum stöðum í nótt. Það verður hlýtt eitthvað áfram þótt aftur hvessi og rigni.

Lögreglumenn biðja fólk sérstaklega að hemja trampólín í húsagörðum, en þau hafa víða tekist á loft og fokið langar leiðir.