Útgjöld til menntamála hafa aukist um 70% á níu árum

Á milli áranna 1998 og 2007 hafa árleg útgjöld til menntamála aukist um 15 milljarða króna og er þá tekið tillit til verðlagsbreytinga. Það jafngildir tæplega 70% aukningu. Til samanburðar hafa útgjöld til heilbrigðismála á sama tímabili aukist um 57%.

Þetta kemur fram á vefsíðu fjármálaráðuneytisins. Samkvæmt fjárlögum 2007 eru útgjöld til menntamála samtals 37 milljarðar króna, eða 10,1% af heildarútgjöldum ríkissjóðs.

Í krónum talið hafa útgjöldin aukist mest á háskólastigi eða um 9,2 milljarða króna sem jafngildir 95% aukningu þau fara úr 9,6 milljörðum kr. árið 1998 í 18,8 milljarða í ár. Hlutfallslega hafa hins vegar útgjöld til námsaðstoðar hækkað mest eða um 121%, þau voru 248 milljónir en eru nú 550 milljónir kr.

Helstu skýringar á hækkunum útgjalda til menntamála er aukið námsframboð og nemendafjölgun.