Sicko vekur lukku á Cannes

Sicko, nýjustu mynd Michael's Moore var gríðarlega vel tekið þegar hún var frumsýnd á Cannes hátíðinni á Laugardag. Tvö þúsund áhorfendur klöppuðu myndinni lof í lófa og hafa gagnrýnendur ausið hrósi yfir þessa fyrstu mynd Moore, frá því hann gaf út Farenheit 9/11.

Í myndinni ræðst Moore á heilbrigðiskerfi Bandaríkjanna, sem honum finnst meingallað.

Myndin verður ekki frumsýnd í Bandaríkjunum fyrr en í júní, en hefur nú þegar vakið úlfúð heimafyrir. Repúblíkanar gagnrýna myndina fyrir atriði þar sem Moore fylgir hópi veikra manna sem unnu sem björgunarmenn í World Trade Center til Kúbu til að leita sér lækningar.

Kúbuferðin varð þess valdandi að fjármálaráðuneyti Bandaríkjanna hóf rannsókn á því hvort hann hafi brotið gegn viðskipta- og ferðabanni Bandaríkjanna gagnvart Kúbu, sem gerir flestum Bandaríkjamönnum ókleift að ferðast til landsins.

Þó einhverjir hafi haldið því fram að rannsóknin sé bara ókeypis auglýsing fyrir myndina, er Moore ekki sammála því. ,,Það er verið að rannsaka mig persónulega, og ég er sjálfur ábyrgur fyrir mögulegum sektum eða fangelsisvist, svo mér er ekki hlátur í hug." sagði Moore.

Leikstjórinn geymir, að ráði lögfræðinga sinna, frumrit myndarinnar utan Bandaríkjanna, skildi þarlendum stjórnvöldum detta í hug að leggja hald á hana.

Sicko hefur hlotið einróma lof gagnrýnenda og hélt Stephen Schaefer, hjá Boston Herald því fram að myndin myndi slá aðsóknarmet Farenheit 9/11 sem rakaði inn 122 milljónum dala í aðgangseyri í Bandaríkjunum.