Ríkið dæmt skaðabótaskylt vegna galla á útboði

Héraðsdómur Reykjavíkur staðfesti í dag rétt Hópbílaleigunnar til að sækja ríkið um skaðabætur vegna galla á framkvæmdum við útboð á skólaakstri. Mögulegt er að ríkið hafi einnig skapað sér skaðabótaskyldu gagnvart skólanemendum á Suðurnesjum að mati framkvæmdastjóri fyrirtækisins. Tilboð Hópbílaleigunnar var um 15 milljón krónum lægra en það tilboð sem var samþykkt.

Útboð ríkisins til skólaaksturs á Suðurlandi og Suðurnesjum fór fram í september árið 2005. Þrjú fyrirtæki buðu í aksturinn, Þingvallaleiðir ehf, Hópbílaleigan ehf. og Kynnisferðir ehf. Tilboð Hópbílaleigunnar til aksturs á Suðurnesjum var lægst en næst lægst á Suðurlandi. Vegagerðin, fyrir hönd ríkisins, ákvað hins vegar að taka tilboði Kynnisferða fyrir Suðurnesin þar sem talið var að Hópbílaleigan ehf. hefði hvorki tæknilega né fjárhagslega burði til að sinna þeim verkefnum sem útboðið tók til. Hópbílaleigan vildi ekki sætta sig við þessa niðurstöðu og kærði málið. Fyrst til Kærunefndar útboðsmála og síðan til Héraðsdóms Reykjavíkur til að fá staðfestingu á skaðabótaskyldu ríkisins.

Í dómi Héraðsdóms er réttur Hópbílaleigunnar til skaðabóta úr hendi ríkisins vegna missis hagnaðar viðurkenndur. Var ríkinu ennfremur gert skylt að greiða Hópbílaleigunni 600 þúsund krónur í málskostnað.

Benedikt Guðmundsson, framkvæmdastjóri Hópbílaleigunnar, sagði í samtali við Vísi að næsta skref í málinu væri að reikna út tap fyrirtækisins vegna útboðsins og leggja fram kröfu um skaðabætur. Þá sagði hann dóminn einnig vekja upp spurningar um skaðabótaskyldu ríkisins gagnvart nemendum á Suðurnesjum sem hafi neyðst til að greiða meira fyrir skólaakstur sökum þess að lægsta tilboðinu var ekki tekið. „Við hyggjumst skoða hversu mikið fjárhagslegt tjón nemendur á Suðurnesjum hafa orðið fyrir vegna þessa máls."