Stærð þorskveiðistofns minni en áætlað var

Útlit er fyrir að þorskárgangurinn í fyrra sé slakur líkt og árið 2005 en þó töluvert betri en árið 2004. Þá benda vísitölur til að stærð þorskveiðistofnsins sé nú um 10-15 prósentum minni en áður hefur verið áætlað. Þetta er meðal niðurstaðna í vorralli Hafrannsóknarstofnunar sem fram fór í febrúar og mars.

Þar voru þrír togarar og tvö rannsóknarskip á ferð og mældu stærð botnfisksstofna á Íslandsmiðum. Fram kemur á heimasíðu Hafró að stofnvísitala þorsks hafi lækkað um 17 prósent frá mælingum í fyrra og sé vísitalan svipuð og árin 2000-2002. Ástæða þessa er sú að minna fékkst af ungfiski af árgöngum allt frá árinu 2001.

Mest fékkst af þorski á Vestfjarðamiðum, djúpt út af Norður- og Norðausturlandi og í Hvalbakshalla fyrir suðaustan lan.

Fyrsta mat á stærð 2006-árgangsins bendir til þessa að hann svipað stór og 2005-árgangurinn eða um 130-140 milljónir þriggja ára nýliða. Árgangurinn frá 2004 mælist sem fyrr mjög lélegur eða um 60-80 milljónir.

Stofnvísitala ýsu var há líkt og undanfarin fjögur ár en lækkaði þó um 12 prósent frá fyrri mælingu og þá reyndist vísitala ufsa lægri en undanfarin þrjú ár. Vísitala steinbíts var hærri en síðustu þrjú ár en þá var hún í lágmarki. Enn fremur var stofnvísitala löngu sú hæsta sem mælst hefur í vorralli frá upphafi.

Niðurstöðurnar sem kynntar eru nú eru til bráðabirgða en lokaúttekt á niðurstöðum og tillögur Hafrannsóknastofnunarinnar um aflamark fyrir næsta fiskveiðiár verða kynntar í byrjun júní.