Svissnesk fyrirtæki áttu bestu boð í ný farsímaleyfi

Póst- og fjarskiptastofnun veitir á næstu dögum tíðniheimildir til starfrækslu tveggja nýrra farsímaneta. Fjögur símafyrirtæki hafa sóst eftir tíðniheimild. Tvö svissnesk símafyrirtæki áttu bestu tilboðin, það eru Amitelo og Bebbicell.

Þau buðu mestu útbreiðsluna á sem skemmstum tíma. Amitelo bauð 95 prósenta útbreiðslu eftir þrjú ár sem er rétt aðeins minna en Síminn en hann er með 98 prósenta útbreiðslu á landinu. Bebbicell bauð tæplega 94 prósenta útbreiðslu eftir þrjú ár.

Íslensku fyrirtækin sem sóttu einnig um voru IP-fjarskipti og 09 Mobile. Forstjóri Póst- og fjarskiptastofnunar segir að útbreiðslan sem símafyrirtækin bjóði skipti höfuðmáli við mat umsókna. Einnig verði skoðað verðið sem fyrirtækin bjóða neytendum og önnur þjónusta.