Íslandsmet í fiskveiðum? Tveir menn með 17 tonn á tíu tímum

Þessi fimmtán tonna smábátur, Guðmundur Einarsson ÍS, var aflahæstur allra smábáta við Ísland á síðasta fiskveiðiári, með 1510 tonn. Tveir aðrir bátar úr Bolungarvík komu næstir á eftir með litlu minni afla, Hrólfur Einarsson og Sirrý. Aflinn úr veiðiferðinni í gær var hins vegar slíkur að hvorki heimamenn né sérfræðingar á fiskistofu hafa heyrt um þvílíka veiði hjá bát af þessari stærð. Þeir Egill Jónsson og Bjarki Friðbergsson réru út klukkan fimm í gærmorgun og komu að landi um þrjúleytið með sautján tonn um borð og 47 kílóum betur. Aflinn var fenginn á línu, sem vel að merkja, fimm menn í landi beittu, en þeir teljast einnig til áhafnar, en alls réru þeir út með 28 bala af línu.

Ellefu fiskikör um borð voru öll kjaftfull, en rúmuðu aðeins innan við helming aflans. Restin af aflanum var dreifð um allan bát og raunar hluti geymdur í hafi því svo drekkhlaðinn var báturinn orðinn að þeir neyddust til að skilja eftir í sjónum 4 bala af línu. Þeir sóttu svo í dag aflann sem þeir skildu eftir í gær og reyndust þar vera tvö tonn til viðbótar. Þeir veiddu því í raun nítján tonn þennan dag. Fiskisagan flaug hratt um bæinn og heimamenn í Bolungarvík flykktust niður á bryggju til sjá ævintýrið með eigin augum. Reyndir menn telja að búast megi við jafnvel enn meiri afla á næstu dögum. Útgerðarfélagið Ós gerir út bátinn en aflinn var seldur á markaði og fengust um eitthundrað krónur fyrir steinbítskílóið, eða samtals um 1,7 milljónir króna. Þessi væna lúða kom einnig með. Það eina sem sjómennirnir kvörtuðu undan var hvað það tók þá langan tíma að landa aflanum.

Drekkhlaðnir bátar streyma inn á hafnir á Suðurnesjum, aðallega með þorsk og hafa löndunarmenn ekki undan. Svo mikill er aflinn að í Grindavík lágu nú síðdegis átta bátar í löndunarbið. Þar hafa smábátar einnig verið í mokfiskeríi og landaði Gísli Súrsson 16,9 tonnum í gær, og Auður Vésteinsdóttir og Hraunsvík lönduðu um fimmtán tonnum hvor, en allir eru þessi bátar um fimmtán tonn að stærð.