Stjórnvöld án markmiða í loftlagsmálum

Ingibjörg Sólrún Gísladóttir, formaður Samfylkingarinnar, segir íslensk stjórnvöld ekki hafa sett sér markmið um takmörkun á losun gróðurhúsalofttegunda eins og flestar þjóðir Evrópu hafi gert. Forsætisráðherra segir að Íslendingar muni ekki skerast úr leik þegar reynt verði að ná samstöðu þjóða um þetta mál.

Formaður Samfylkingarinnar kallaði eftir skoðunum forsætisráðherra varðandi markmið um takmörkun á losun gróðurhúsalofttegunda á Alþingi í gær. Norðurlönd og Evrópuríki ætluðu að draga úr losun um 30 prósent fyrir 2020 og Bretar um 60 prósent fyrir 2050.En tvö þingmál Samfylkingarinnar um þessi mál sem lögð voru fram í haust hafa ekki fengist rædd á Alþingi. Formaðurinn spurði hvert yrði samningsumboð íslensku sendinefndarinnar á loftlagsráðstefnu sameinuðu þjóðanna á Balí í haust.

"Mun það verða samningsmarkmið okkar að draga úr losun gróðurhúsalofttegunda um 30 prósent fyrir 2020 eða mun áfram verða gert út á okkar sérstöðu og reynt að ná í viðbótarkvóta eins og jafnvel hefur mátt skilja á hæstvirtum umhverfisráðherra í þeirri fjölmiðlaumræðu sem hér hefur farið fram," spurði Ingibjörg Sólrún.

Geir H Haarde forsætisráðherra sagði horfur í loftlagsmálum grafalvarlegar. Íslendingar notuðu hins vegar mest endurnýjanlega orku og gætu flutt þekkingu og tækni í þeim efnum til annarra þjóða.

"Það er rangt að gera því skóna að eithvað af því sem hér er að gerast sé með einhverjum hætti Íslendingum að kenna. Þvert á móti höfum við lagt okkar að mörkum til að draga úr mengun og auka notkun endurnýjanlegra orkugjafa," sagði forsætisráðherra.

Ingibjörg Sólrún sagði að það væru s.s. Bush (Bandaríkjaforseti)  og Geir H Haarde sem stæðu eftir eins og sandstólpar í þessu máli og gætu ekki tekið afstöðu til málsins á meðan allir aðrir gætu gert það.

"Íslenska ríkisstjórnin og vonandi við öll, Alþingi allt, mun koma fram af fyllstu ábyrgð í þessu máli. Okkar sendinefnd á þeirri ráðstefnu sem þingmaðurinn gat um mun koma þangað upprrétt," sagði Geir H Haarde forsætisráðherra.