Hafís nánast kominn upp að landi Vestfjörðum

Hafís er kominn nánast upp að landi við Kóp, Sléttanes og Barða við Arnarfjörð á Vestfjörðum og segir veðurstofan að siglingaleiðir undan Vestfjörðum geti verið varasamar af þeim sökum, sérstaklega í mykri.

Að sögn Ásdísar Auðunsdóttur hjá Veðurstofu Íslands er ísinn ekki þéttur en töluvert sé þó um hafísspangir á þessum slóðum. Hún segir engar tilkynningar hafa borist um borgarísjaka á svæðinu. Veðurstofan reiknar með að hafísinn þéttist á næstunni þar sem áframhaldandi vestanátt er í kortunum. Landhelgisgæslan ætlaði í ískönnunarflug í dag en þar sem ekki tókst að gera við bilun í Fokker-vél Gæslunnar fyrr en eftir hádegi í dag þótti ekki rétt að senda vélina af stað þar sem birta fór þverrandi.