Verð á fiski hækkar

Gengislækkun krónunnar og aukin eftirspurn eftir ferskum íslenskum fiski í útlöndum veldur því að fiskur hefur hækkað um tíu til tuttugu prósent í fiskbúðum og fiskborðum stórverslana á höfuðborgarsvæðinu, á einu ári.

Dæmi eru um enn meiri hækkun í fiskbúðum, eða allt að þrjátíu prósentum, samkvæmt nýrri verðkönnun ASÍ. Kannað var verð á 29 tegundum fiskmetis og var það oftast hæst í Fiskisögu við Sundlaugaveg, en verðið var oftast lægst í fiskborði Fjarðarkaupa í Hafnarfirði. Níutíu prósenta verðmunur var til dæmis á saltfiski í þessum búðum, en algengur munur á hæsta og lægsta verði á milli búða var 40 prósent.

Margt leggst á eitt við að skrúfa hækkunina upp. Hráefnisverð á ýsu á fiskmörkuðum hefur til dæmis hækkað um heil 50 prósent á einu ári. Gengi krónunnar hefur lækkað um 20 prósent, þannig að útflytjendur á ferskum fiski geta boðið fleiri krónur í fiskinn en fyrir ári og viðvarandi er það ástand að eftirspurn á mörkuðum er mun meiri en framboð. Aðeins fimmtungur, eða um 20 prósent af bolfiski, sem veiðist hér við land fer á markaðina, kvótaeigendur flytja svo meirihlutann út sjálfir. Það er því svo komið að íslenskir neytendur borga í vissum tilvikum meira fyrir soðninguna, sem veidd er svo til við húsvegginn, en útlendingar í fjarlægum löndum.