Haraldur Johannessen þarf að víkja sæti

Hæstiréttur Íslands úrskurðaði í dag að Haraldur Johannessen, ríkislögreglustjóri, skuli víkja sæti við rannsókn á meintum skattalagabrotum Baugsmanna.

Jón Ásgeir Jóhannesson, systir hans Kristín Jóhannesdóttir, Jóhannes Jónsson faðir þeirra, Tryggvi Jónsson, fyrrverandi aðstoðarforstjóri Baugs, og Stefán Hilmarsson, endurskoðandi kröfuðust þess að rannsókn Ríkislögreglustjóra á ætluðum skattalagabrotum þeirra yrði dæmd ólögmæt en til vara að allir starfsmenn embættisins vikju sæti við rannsóknina.

Héraðsdómur Reykjavíkur komst að þeirri niðurstöðu fyrir jól að Jón HB Snorrason, saksóknari og yfirmaður efnahagsbrotadeildar Ríkislögreglustjóra og Haraldur Johannessen, ríkislögreglustjóri, væru vanhæfir til að fara með rannsókn á meintum skattalagabrotum þeirra.

Hæstiréttur taldi að með ákveðnum ummælum hefði ríkislögreglustjóri orðið vanhæfur í málinu og var því fallist á kröfu sakborninganna um að hann viki sæti. Hins vegar var því hafnað að öðrum starfsmönnum embættisins bæri að víkja sæti í málinu.