Vatnajökulsþjóðgarður verður stærsti þjóðgarður Evrópu

Jónína Bjartmarz umhverfisráðherra mælti í dag fyrir frumvarpi um stofnun Vatnajökulsþjóðgarðs á Alþingi. Garðurinn verður stærsti þjóðgarður Evrópu ef frumvarpið nær fram að ganga.

Fram kemur í athugasemdum um frumvarpið að málið eigi sér aðdraganda allt frá árinu 1999 en svæðið sem þjóðgarðurinn á að ná yfir er sagt einstakt frá náttúruverndarsjónarmiði hvort sem litið er til Íslands eða á heimsvísu. Hefur verið bent á það sérkenni svæðisins séu slík að það gæti hugsanlega komist á heimsminjaskrá UNESCO.

Gert er ráð fyrir að tveir núverandi þjóðgarðar, þ.e. Skaftafellsþjóðgarður og þjóðgarðurinn í Jökulsárgljúfrum, renni strax í upphafi inn í Vatnajökulsþjóðgarð en landssvæðið sem rætt hefur verið um að þjóðgarðurinn nái til nær til stjórnsýslu átta sveitarfélaga.

Áætlað er að kostnaður við rekstur og viðhald þjóðgarðsins verði 325 m.kr. á ársgrundvelli eftir að hann verður að fullu uppbyggður.