ESSO lækkar verð á eldsneyti

ESSO hefur ákveðið að lækka verð á öllum eldsneytistegundum. Lækkar lítrinn af bensíni um fimmtíu aura en dísil-, gas-, flota- og svartolía lækkar um eina krónu. Fram kemur í tilkynningu frá ESSO að þetta sé 56. verðbreyting félagsins síðan í júlí í fyrra en síðast lækkaði verð á bensíni fyrir viku.

Skýring lækkunarinnar nú er sterkari staða krónunnar og lækkandi heimsmarkaðsverð á eldsneyti og er lækkunin gerð í trausti þess að krónan verði áfram jafn sterk og nú eins og segir í tilkynningu ESSO. Eftir lækkunina verður algengasta verð á 95 oktana bensíni hjá Olíufélaginu 111 krónur.

Þess má geta að olíuverð á heimsmarkaði fór niður fyrir 50 dollara á tunnu í gær í fyrsta sinn í 19 mánuði.