Innlent

Alþingi í gíslingu stjórnarandstöðunnar - tröllhlegið um land allt

Upplausnarástand ríkir enn á Alþingi. Stjórnarþingmenn sökuðu stjórnarandstöðuna í morgun um að halda Alþingi í gíslingu með grímulausu málþófi.

Umræða um Ríkisútvarpsfrumvarpið stóð yfir til klukkan tvö í nótt og flutti enginn stjórnarandstöðuþingmaður styttri en einnar klukkustundar ræðu og Ögmundur Jónasson, sá sem lengst var í ræðustól í gær, talaði í tæpar fjórar klukkustundir.

Stjórnarandstaðan freistar þess að höggva á hnútinn með sáttatilboði um að gildistöku frumvarpsins verði frestað fram yfir kosningar og vildi Össur Skarphéðinsson við upphaf þingfundar í morgun fá svar við því hvers vegna Framsóknarflokkurinn væri á móti slíkri sátt.

Hann fékk það svar frá Jóni Sigurðsssyni, formanni flokksins, að þingmaðurinn væri að skemmta sér og menntamálaráðherra væri talsmaður ríkisstjórnarinnar í menningarmálum.

Þorgerður Katrín Gunnarsdóttir menntamálaráðherra hafnaði sáttartilboðinu, sem hún sagði ekkert annað en leikaraskap til að fela þau vandræði sem stjórnarandstaðan væri komin í. Hún spurði afhverju þetta þing ætti að afsala sér valdinu til meirihluta næsta þings. Húnminnti á að búið væri að ræða málið í 120 klukkustundir og spurði hvort menn væru ekki búnir að fá nóg.

Fleiri stjórnarliðar tóku undir þetta, þeirra á meðal Guðjón Ólafur Jónsson, sem sagði að það væri tröllhlegið að þingmönnum stjórnarandstöðunnar út um allt land. Þessari stóru brandarakeppni stjórnarandstöðunnar væri lokið. Nú væri mál að linni.

Sigurður Kári Kristjánsson, formaður menntamálanefndar, sagði að stjórnarandstaðan hefði hneppt Alþingi Íslendinga í gíslingu. Alþingi væri stórskaðað af framkomu stjórnarandstæðinga.

Mest lesið


Fleiri fréttir

Sjá meira


×

Mest lesið