Óvíst hvort takmarka þurfi veiðar víðar en í Elliðaánum

Gripið verður til takmarkana á laxveiðum úr Elliðaánum vegna nýrnaveikismits. Það hefur greinst í óvenju mörgum laxveiðiám í haust, en ekki liggur fyrir hvort takmarka þarf veiðar víðar.

Um það bil hundrað laxveiðiár eru í landinu og er klak stundað á laxi úr mörgum þeirra til að styrkja stofnana í þeim. Það er einmitt í klakstöðvunum, sem veikin getur magnast upp og því er gripið til að farga hrognum ef sýki finnst, eins og gerðist við klakið í Elliðaánum í haust.

Vegna þess hafa Orkuveita Reykjavíkur og Stangaveiðifélag Reykjavíkur í sameiningu ákveðið að takmarka enn frekar laxveiðar í ánum og verður hámarksfjöldi veiddra laxa hvern hálfan dag í sumar þrír laxar í stað fjögurra.

Í tilkynningu Orkuveitunnar segir að sumarið 2008 kunni að verða dregið enn frekar úr veiðum í Elliðaánum. Laxveiðin í Elliðaánum síðastliðið sumar var 900 laxar og þar af var 841 fiskur af náttúrulegum stofni Elliðaánna en 59 voru afrakstur seiðasleppinga. Sum staðar er hlutfall vegna seiðasleppinga enn hærra, en víða þar sem veikin hefur greinst í haust, hefur ekki þurft að farga öllum hrognum og allvíða hafa veiðifélög upp á varasjóði hrogna að hlaupa. Á þessari stundu er því ekki hægt að segja til um hvort veiðar verða víðar takmarkaðar en í Elliðaánum.