Síldargengd í Grundarfirði kemur sérfræðingum ekki á óvart

Þorsteinn Sigurðsson, fiskifræðingur hjá Hafrannsóknarstofnun segir síldargegndina í Grundarfirði ekki koma sérstaklega á óvart. Síldarstofninn hafi verið að styrkjast fyrir vestan land síðustu þrjú til fögur ár og 85% síldarstofnsins hafi mælst á þessum slóðum í febrúar í fyrra. Sérstakur könnunarleiðangur verður farinn til Grundafjarðar þegar tveggja daga veðurstillum verður náð svo grugg nái að setjast.

Skip Hafrannsóknarstofnunar leggur hinsvegar af stað í árlega 14 daga síldarmælingu í dag til að mæla síldarstofninn í heild sinni og hefjast mælingar fyrir austan land og enda vestanlands. Síldarstofninn hefur verið að styrkjast frá því að stofninn hrundi í kringum 1970 og segir Þorsteinn að þakka megi stækkun stofnsins hóflegri nýtingarstefnu Hafrannsóknarstofnunnar sem stjórnvöld hafi farið eftir.

Síldarkvótinn var aukinn á síðustu vertíð og var kvótinn sem gefin var út fyrir þetta fiskveiðiár 138 þúsund tonn. Samkvæmt upplýsingum frá Fiskistofu eru rúm 7 þúsund tonn eftir af kvótanum. Fjölveiðiskipið Krossey frá Hornafirði, sem brást fljótt við fregnum af mikilli síldargegnd í Grundarfirði í gær, er nú úti fyrir Vík í Mýrdal og áætlar að landa upp úr miðnætti í nótt en tekur þá til við loðnuveiðar.