Hrafn á slóðum forfeðranna

„Við vorum bara að athuga hvaðan forfeður ömmu minnar voru og hvar þeir höfðu búið," segir kvikmyndaleikstjórinn Hrafn Gunnlaugsson.

Hrafn, ásamt fjölda ættingja sinna, lagði upp í mikla reisu um Þýskaland og Ítalíu þar sem þau þræddu smábæi í löndunum í leit að híbýlum forfeðra Ell-enar Sveinsson, eiginkonu Þórðar Sveinssonar, sem var yfirlæknir á Kleppsspítala en Þórður og Ellen eru foreldrar Gunnlaugs heitins Þórðarsonar hæstaréttarlögmanns, föður Hrafns. Og hefur ættin yfirleitt kennt sig við geðsjúkrahúsið og kallað sig Kleppara. „Ég hef reyndar ekki mikið vit á þessari ættfræði og fór eiginlega bara meira til að skemmta mér og sjá," bætir Hrafn við.

Hópurinn þvældist út um allt í rútu en elsti ferðalangurinn var Sverrir Þórðarson en hann er eitt eftirlifandi barna Þórðar og Ellenar. Í hádeginu á Rás 1 í gær var ferðasagan síðan lesin í heild sinni og voru það barnabarnabörn þeirra Ell­enar og Þórðar, þau Nína Björk Jónsdóttir og leikarinn Ólafur Egill Ólafsson, sem stjórnaði. Nína Björk sagði sjálf að þetta hefði verið mikil upplifun og í raun hefðu þau gert sér grein fyrir því að mannkynssagan væri þeim mun nær en þau hefðu gert sér í hugarlund. „Langamma var dönsk en var komin af frönskum húgenottum sem flúðu ofsóknir í heimalandi sínu," segir Nína. „Hluti af þeim settist að í Danmörku og þar varð til hálfgerð nýlenda þar sem töluð var franska langt fram eftir 19. öldinni," bætir hún við.

En Danmörk var aðeins brot af mun stærri heild. „Langafi langömmu var ítalskur og við töldum um tíma að hann hefði verið hermaður í her Napóleons sem herjaði á Evrópu. En eftir að hafa rannsakað málið á netinu komumst við í raun um að hann var hluti af fjónska herliðinu," segir Nína og skellir upp úr enda hafði þá mesti glamúrinn farið af þeirri sögu. „En það sem við lærðum eiginlega mest af þessari ferð er að þessi ætt getur eiginlega farið í endalaus ferðalög enda nóg eftir að skoða," segir Nína.