Bílarnir sagðir í vörslu Annþórs Karlssonar

Bifreiðarnar átta sem brunnu í porti í Vogum á Vatnsleysuströnd í morgun, munu hafa verið í eigu eða vörslu Annþórs Kristjáns Karlssonar, samkvæmt heimildum Vísis. Unnið er að rannsókn málsins og mun hún vera á frumstigi og því vildi lögregla ekkert tjá sig um málið að svo stöddu. Portið þar sem sem bílarnir stóðu er við skemmu eina á Hafnargötu 6 við höfnina í Vogum.

Heimildir Vísis herma einnig að glæsikerrunum hafi nýlega verið lagt í portinu eða í byrjun vikunnar.

Annþór komst í fréttirnar árið 2005 þegar hann var dæmdur í þriggja ára fangelsi fyrir stórfellda líkamsárás. Hann hafði verið eftirlýstur af lögreglu og var handtekinn á Keflavíkurflugvelli þar sem hann reyndi að flýja land. Hann hafði í slagtogi við tvo aðra menn veist að manni, sem lá slasaður í rúmi sínu, og barið hann í líkama og höfuð með trékylfu. Hann á að baki langan sakaferil en lauk afplánun fyrr á árinu.

Eigandi skemmunnar, Ólafur Ragnar Guðbjörnsson, segist ekki hafa hugmynd um hvernig stóð á því að bílarnir voru á svæðinu. Hann sagði algengt að fólk geymdi hluti þar og að hann hafi ekki vitað af bílunum. Ólafur var á leiðinni á Hafnarbrautina til þess að kanna aðstæður þegar Vísir talaði við hann en hann sagðist telja að bílarnir hafi verið á lóðamörkum og ekki endilega á lóðinni hans. Skemman, sem Ólafur segir að sé í útleigu, skemmdist ekki í eldhafinu sem var gríðarlega mikið á tíma eins og sjá má á myndunum.

Þarna var um að ræða dýrar bifreiðar, engin metin undir átta milljónum og því gæti tjónið verið töluvert yfir 70 milljónum króna. Slökkviliðinu á Suðurnesjum barst tilkynning rétt fyrir klukkan sex í morgun um brunann. Nágrannar í Vogum höfðu vaknað við sprengingar og óhljóð og tilkynntu Neyðarlínunni um brunann. Bifreiðarnar átta í portinu voru flest allar nýjar, meðal annars einn Hummer, tveir BMW og Dodge Viper, þá skemmdist einnig hraðbátur í brunanum.

Ekki náðist í Annþór við vinnslu fréttarinnar.