Innlent

Bandaríkjamenn sömdu sig frá tiltekt

Í viðaukum við varnarsamninginn sem utanríkisráðuneytið létti leynd af í dag kemur fram að Bandaríkjamönnum er ekki skylt að hreinsa upp eftir sig eða skila varnarsvæðunum í því ástandi sem þeir tóku við þeim. Þó skulu þeir kappkosta að ganga frá úrgangsefnum sem kostur gefst.

Utanríkisráðherra aflétti í dag leynd af óbirtum viðaukum við varnarsamning Íslands og Bandaríkjanna frá árinu 1951, auk samninga um breytingar á viðaukunum sem undirritaðir voru 11. október 2006. Viðaukana má finna í heild sinni ávefsíðu ráðuneytisins.

Í áttundu grein viðauka við varnarsamninginn frá 1951 segir: "Eigi er Bandaríkjunum skylt að afhenda Íslandi samningssvæðin við lok samnings þessa í sama ástandi, sem þau voru í, er Bandaríkin fengu þau til afnota. Þó skulu Bandaríkin við brottför af samningssvæðunum, eftir því sem við verður komið, flytja burtu úrgangsefni, eyða þeim eða á annan hátt ganga frá þeim."

Breytingunum sem undirritaðar voru í október síðastliðnum fylgir langur listi af kortum og GPS-hnitum sem sýna þá staði sem Bandaríkjamenn hafa haft einhverja starfsemi eða æfingapláss.

Í síðustu grein þess viðauka fría Bandaríkjamenn sig af allri ábyrgð af slysum á fólki eða eignatjóni sem verði á varnarliðssvæðinu eftir að Íslendingar hafi tekið við því. Einnig eru íslensk stjórnvöld skuldbundin til þess að taka við ábyrgð og skaðabótakröfu sem hugsanlega gæti verið gerð vegna skaða sem varð á meðan Bandaríkjamenn voru á svæðinu.

Mest lesið


Fleiri fréttir

Sjá meira


×

Mest lesið