Lalla-auglýsingar enn í deiglunni

„Til að fyrirbyggja allan misskilning er rétt að fram komi að SÍA - samband íslenskra auglýsingastofa - kemur aldrei að starfsemi auglýsingastofa. Og blessar ekki auglýsingar," segir Ingólfur Hjörleifsson, framkvæmdastjóri SÍA.

Auglýsing Öryggismiðstöðvarinnar með Lalla Johns í aðalhlutverki er umdeild - að margra mati á mörkum hins siðlega - en höfðað er til þess að menn séu ekki öruggir þegar menn eins og Lalli eru annars vegar. Í frétt Fréttablaðsins um hana í gær kom fram í máli Eiríks Aðalsteinssonar, framkvæmdastjóra auglýsingastofunnar Himins og hafs, að SÍA auk aðstandenda Lalla hefði lagt blessun sína yfir auglýsingarnar. Eiríkur segist hafa rætt málið við Ingólf og óheppilegt sé að orða þetta með þeim hætti. Eiríkur segir að verið sé að höfða til forvarnagildis og segir viðbrögð flestra jákvæð.

„Neinei, Ingólfur blessar ekki auglýsingar. En við sýndum honum hvernig við vorum að vinna þetta til að athuga hvort auglýsingarnar væru ekki innan þeirrar stefnu sem SÍA markar. Þar eru ákveðnar siðareglur sem við viljum alls ekki brjóta," segir Eiríkur. En tekur fram að ekki sé svo að SÍA ritskoði auglýsingar, hvorki sinnar stofu né annarra, og því ekki um að ræða, í þeim skilningi að auglýsingarnar hafi verið bornar undir Ingólf í þeim tilgangi að fá blessun hans.

Ingólfur segir enda samtökin ekki hafa neitt slíkt umboð. En hjá þeim sé hins vegar að finna siðanefnd en þangað má kvarta undan auglýsingum sem mönnum þykir orka tvímælis. Sú siðanefnd er skipuð tveimur frá auglýsingastofum innan sambandsins, einum frá Neytendastofu, einum frá Viðskiptaráði Íslands og einum frá samtökum auglýsenda.

„Nei, okkur hefur ekki borist kvörtun vegna þessarar auglýsingar," segir Ingólfur.