Hugleikur vinsæll í Finnlandi

Bók Hugleiks Dagssonar "Skould you be laughing at this?" hefur notið töluverðra vinsælda í Finnlandi eftir að hún kom þar út í síðasta mánuði. Fyrsta upplagið er uppselt en von er á öðru upplagi fyrir bókamessuna í Helsinki í næsta mánuði. Um tíma var bókin í efsta sæti á metsölulista Helsingin Sanomat stærsta dagblaðs í Finnlandi.

Greint er frá þessu í nýjasta hefti veftímaritsins Stiklur um menningar- og landkynningarmál. Von er á frekari útgáfum á íslenskum skáldsögum í Finnlandi á næstunni. Kleifarvatn Arnalds Indriðasonar verður gefin út í þýðingu Seiju Holopainen en þetta er þriðja bók Arnaldar sem kemur út á finnsku.

Og í þessum mánuði verður bókin Þriðja táknið eftir Yrsu Sigurðardóttur gefin út á finnsku af Otava sem er stærsta og öflugasta forlag Finnlands.