Dómaralaust í knattspyrnunni?

Knattspyrnudómarar í efstu deildum hér á landi eru allir samningslausir og saka KSÍ um áhugaleysi við endurnýjun samninga. Samningar dómaranna runnu út nú um áramótin.

Á fjórða tug dómara funduðu í síðustu viku um sín kjaramál og samkvæmt heimildum íþróttadeildar Stöðvar 2 hafa dómarar fengið sig fullsadda og kvarta undan slæmum kjörum. Þeir eru sammála um að kjör þeirra þurfi að bæta all verulega til þess að þeir endurnýi saminga sína við KSÍ. Hljóðið er þungt í þeim dómurum sem íþróttadeildin hefur rætt við nú um helgina en þeir saka KSÍ um áhugaleysi á að leysa málið. Nokkrir reyndir dómarar íhuga jafnvel alvarlega að hætta dómgæslu alfarið vegna þeirrar stöðu sem upp er komin.

Magnús Þórisson, formaður félags deildardómara, staðfesti í dag að á fundinum hafi dómarar samþykkt einróma að dæma ekki samningslausir. Náist samningar ekki á næstu dögum má því búast við að fresta þurfi Reykjavíkurmótinu í knattspyrnu sem fyrirhugað er að hefjist 20. janúar og keppni í deildarbikar sem á að hefjast í febrúar.

Geir Þorsteinsson framkvæmdastjóri KSÍ sá sér ekki fært um að veita viðtal vegna málsins í dag en vildi láta hafa eftir sér að dómarar hefðu farið fram á umtalsverða hækkun á sínum launum sem knattspyrnusambandið væri ekki reiðubúið að verða við. Hins vegar sagði Geir að til stæði að hitta dómarana aftur að máli nú í vikunni.

Dómari fékk á síðasta tímabili 7.770 krónur í laun fyrir að dæma leik í Landsbankadeild karla. Við þá upphæð bætast 4000 krónur í dagpeninga vegna undirbúnings, grunntaxtinn í akstursgreiðslur er 1900 krónur innanbæjar auk matarpeninga samkvæmt taxta BSRB.

Þá eru dómarar einnig ósáttir við þann aðgang sem þeir hafa að þjálfurum til að halda sér í formi. Birkir Sveinsson mótastjóri KSÍ sagði í samtali við íþróttadeild í dag, að auka ætti við aðgang dómara að þjálfurum og muni þeir hafa aðgang að slíkum tvisvar sinnum í viku.

Eins og staðan er í dag er KSÍ því dómaralaust í efstu deildum þar til samningar nást og virðist vera langt í land með að af því verði.