Alvarlegar bilanir á flutningskerfi Landsnets í nótt

Alvarlegar bilanir og rekstrartruflanir urðu á flutningskerfi Landsnets í nótt þegar djúp lægð gekk yfir vestanvert landið með ofsaveðri. Fram kemur í tilkynningu frá Landsneti að laust fyri klukkan tvö hafi Vatnshamralínu 1 slegið út með þeim afleiðingum að spennir fór út í aðveitustöðinni í Laxárvatni við Blönduós auk þess sem einn skáli Fjarðaáls á Reyðarfirði fór út.

Við það einangraðist Fljótsdalsstöð frá kerfinu. Þá fór í stuttan tíma út um 20 megavattaálag hjá almennum notendum á Austurlandi. Við þetta fór einnig út Hólalína 1 og báðar vélar fóru út í Kröflustöð. Í tengslum við þessa truflun á vesturvæng kerfisins fór einnig út Laxárlína 1, frá Laxá til Rangárvalla á Akureyri. Ekki er vitað um ástæðu þess að Vatnshamralína 1 fór út en leiða má að því líkum að um samslátt á vírum hafi verið að ræða enda ofsaveður á svæðinu. Línan fór inn aftur laust eftir klukkan þrjú.

Klukkan hálfþrjú varð svo alvarleg bilun í Brennimelslínu 1 þegar turn í Þyrilsnesi í innanverðum Hvalfirði brotnaði undan veðurofsanum. Við þetta fóru út skáli 2 hjá Norðuráli í Hvalfirði, álag fór út hjá Ísal í Straumsvík og allt álagið hjá Járnblendiverksmiðjunni í Hvalfirði. Auk þessa fóru úr rekstri allar vélar í virkjun Orkuveitu Reykjavíkur á Hellisheiði.

Þá fór Hrútatungulína 1 úr rekstri um kl. 3.10 með þeim afleiðingum að rafmagnslaust varð víða á Vesturlandi. Þessi rekstrartruflun stóð þó aðeins yfir í nokkrar mínútur. Að lokum varð alvarleg bilun í Geiradalslínu 1 klukkan hálffimm þegar tvær tréstæður brotnuðu við Gilsfjörð í Saurbæ.

Starfsmenn Landsnets hafa unnið að viðgerð Brennimelslínu 1 í Hvalfirði og Geiradalslínu 1 í Saurbæ frá því í nótt ásamt með verktökum. Viðgerð verður hraðað eins og kostur er en ekki er hægt að segja nákvæmlega til um hvenær þeim verður lokið.