Slegist um rússneskan lax

„Þeir eru þekktir fyrir að sprengja upp öll verð. Ég er ekki viss um að það verði góður kostur í framtíðinni að fara til Yokanga fyrir hinn almenna veiðimann," segir Hilmar Hansson umboðsmaður veiðiferðaskrifstofunnar Frontiers hér á landi.

Hilmar hefur undanfarin ár verið að selja íslenskum stangveiðimönnum ferðir á Kólaskaga í Rússlandi - nánar tiltekið í Yokanga-á. Að sögn Hilmars hefur Frontiers samning við eigendur árinnar til ársins 2008. En nú hefur Lax ehf, Jón Þór Júlíusson og Gísla Ásgeirsson með fulltingi Peter Rippin, gripið inn í og undirritað samning við Yokanga-menn um umboðssölu í ánna.

Hilmar segir ekki öll kurl komin til grafar í þeim efnum. „Það á eftir að fara yfir þetta af lögfræðingum. En skrýtið að þeir skuli vilja Yokanga sem þeir hafa talað illa um. Erfitt fyrir þá núna að "presentera" hana. Það mun koma út eins og Ragnar Reykáss sé að selja," segir Hilmar ósáttur við að missa Yokanga en hann hefur lagt talsvert í að kynna þennan kost íslenskum veiðimönnum.

„Það er naumast," segir Jón Þór hjá Lax ehf. þegar þessi ummæli eru borin undir hann. Jón Þór hafnar því alfarið að fara í sandkassaleik eins og hann kallar yfirlýsingar Hilmars og neitar að hafa talað illa um Yokanga enda aldrei þangað komið. "Tveir ættingja minna eru að fara í sumar og ég hafði mikinn áhuga á að komast þangað sjálfur. Nei, það er ekki verið að sprengja upp verð á Kólaskaga. Menn þurfa ekki að hafa af því áhyggjur. Eftir sem áður mun íslenskum veiðimönnum bjóðast góðir dagar í Yokanga á sambærilegu verði og verið hefur."

Jón Þór segir þetta til komið í gegnum Peter Rippin og enskt umboðsfyrirtæki sem Lax á hlut í. Og talsvert flóknara sé hvernig veiðiréttur og leyfi í Rússlandi gangi fyrir sig en hér. Lax ehf. er að verða eitthvert umfangsmesta fyrirtæki á Íslandi í sölu laxveiðileyfa og er til dæmis með Laxá í Kjós og Grímsá á sínum snærum... og nú nýlega, Langá í Borgarfirði, þar sem ráðið hefur ríkjum sjálfur Ingvi Hrafn Jónsson.

„Allt gert með fullu samþykki Ingva Hrafns. Hann er ekkert hættur í Langá þó við tökum við og hann verður okkur innan handar með allar breytingar."

Hilmar er síður en svo búinn að gefa Kólaskaga upp á bátinn þó allt líti út fyrir að Yokanga sé runnin honum og Frontier úr greipum.

„Sumarið er vel selt. Við erum einnig með ánna Ponoi sem er flaggskip Frontier á Kólaskaga. Þar geta allir veitt. Vikan gefur að meðaltali 50 laxa. Yokanga er meira fyrir mjög vana veiðimenn," segir Hilmar og upplýsir að hann sé búinn að selja 90 stangveiðimönnum íslenskum ferð á Kólaskagann í sumar. Fyrir það borga menn 300 þúsund auk flugfars til Rússlands.