Prince stúderar Biblíuna

Bandaríski söngvarinn Prince tilkynnti í gær að hann mundi halda 21 tónleika í London í haust. Hann sagðist einnig áforma að taka sér hlé frá tónlist til þess að kynna sér Biblíuna.

Á blaðamannafundi í borginni útskýrði Prince ástæðu þess að London varð fyrir valinu en ekki aðrar Evrópuborgir. Skýringin væri einfaldlega sú að hann elskaði borgina, þar hefði hann haldið marga af sínum bestu tónleikum.

Miðaverð verður 31.21 pund, um það bil fjögur þúsund krónur. Upphæðin er sú sama og heiti nýjustu plötu hans „3121" sem er fyrsta plata Prince í 17 ár sem nær topp sæti í Bandaríkjunum.

Prince átti metsölulög á níunda áratugnum eins og „Purple rain" og „Sign O' The Times" og hann hefur selt um 80 milljónir platna.

Fjölmiðlafulltrúi stjörnunnar sagði að eftir tónleikaferðalagið í London myndi hann ekki flytja metsölulög sín aftur opinberlega, en söngvarinn sjálfur staðfesti þá fullyrðingu ekki.