Landbúnaðarráðherra klæðist kindinni

„Þetta er óskaplega skemmtilegt og íslenska sauðkindin er mikið módel,“ segir Guðni Ágústsson en Gunnlaugur Ingivaldur Grétarsson, annar eigandi bolabúðarinnar Ósóma, afhenti landbúnaðarráðherranum eitt stykki Kind-bol í gær.

Eins og fram kom í Fréttablaðinu fyrir skömmu notast ungir framsóknarmenn við íslensku sauðkindina í sinni auglýsingaherferð fyrir alþingiskosningarnar en þau Þórdís Claessen og Gulli í Ósóma hafa gert kindina nánast ódauðlega í reykvískri götutísku með kindarbolum sínum. Bauðst Þórdís í kjölfarið til þess að gefa landbúnaðarráðherranum alvöru kindarbol enda hefði það verið langþráður draumur hjá henni. Og nú hefur hann ræst.

„Mér þótti mjög vænt um þetta boð því mér þykir mjög vænt um íslensku sauðkindina,“ sagði Guðni en bolurinn sem hann fékk er grænn eins og litur Framsóknarflokksins. „Við getum étið kindina upp til agna og svo er ullariðnaðurinn í miklum blóma enda unga fólkið allt í ullarpeysum um þessar mundir,“ sagði hann. „Og það er eitt sem er svolítið merkilegt við íslensku kindina og það er að hún er í eðli sínu íslensk en líka ákaflega alþjóðleg. Og þannig nær hún til hjarta allra,“ bætir Guðni við. „Svo er íslenska kindin líka í tísku og ég vil tolla í henni.“