KR-útvarpið á tímamótum

KR-útvarpið verður með sína 200. útsendingu á mánudagskvöld þegar KR og Víkingur eigast við í Landsbankadeild karla. „Við vorum að leita leiða til að bæta við stuðningsmannastarfið og þá kviknaði þessi hugmynd,“ segir Höskuldur Höskuldsson, sérlegur útvarpsstjóri KR.

Höskuldur viðurkennir að hugmyndin um sérstaka KR-útvarpsstöð hafi þótt nokkuð klikkuð í upphafi, en í dag er hún orðin órjúfanlegur hluti af umgjörðinni og stemningunni í kringum leiki liðsins. „Við heyrum það og skynjum að stuðningsmennirnir kunna að meta útvarp KR. Við erum með 2-3 tíma langa upphitun fyrir alla heimaleiki og erum með viðtöl við þjálfara og leikmenn eftir leiki. Svona dagskrá kemur mönnum í gírinn og er orðin hluti af leiknum fyrir marga stuðningsmennina,“ segir Höskuldur en útvarp KR sendir út á tíðninni 98,3.

KR-útvarpið hefur lagt mikinn metnað í starf sitt og til marks um það má nefna að þar hefur öllum deildar-, bikar- og Evrópuleikjum verið lýst í beinni útsendingu frá árinu 1999. Allt starf sem tengist útvarpsstöðinni er unnið í sjálfboðavinnu og segir Höskuldur að félagið hafi verið svo heppið að eiga góða áhangendur sem þekkja til í þessum bransa.

Af fjölmörgum stjórnendum útvarpsins síðustu ár má nefna fjölmiðlungana Boga Ágústsson, Jóhann Hlíðar Harðarson, Hauk Holm, Þröst Emilsson, auk útvarpsmannana Ágúst Bogason og Frey Eyjólfsson. Enn fremur hafa Gísli Marteinn Baldursson, Egill Helgason og Bubbi Morthens verið tíðir gestir, „enda annálaðir KR-ingar“ eins og Höskuldur tekur skýrt fram.

Haukur Holm hefur verið viðriðinn útvarpið frá fyrstu útsendingu og segir hann einlæga og fölskvalausa ást á félaginu vera það sem haldið hefur sér við efnið í gegnum tíðina. „Og þar sem ég var aldrei góður í fótbolta er þetta mitt tækifæri til að vinna félaginu gagn. Fyrst ég gat það ekki inn á vellinum þá geri ég það í útvarpinu,“ útskýrir Haukur og hlær. „Ég held að þetta hafi algjörlega sannað sig. Við fáum mikil viðbrögð og ekki síst frá KR-ingum erlendis sem hlusta á leiki í gegnum netið.“

Bogi Ágústsson segir það mikið afrek að hafa starfrækt útvarp af þessu tagi í jafn langan tíma og raun ber vitni. „Þarna fáum við hlutlausu fjölmiðlamennirnir útrás fyrir skoðunum okkar og tökum afstöðu. Við erum allir brennimerktir KR-ingar og höfum gaman af félagsskap hvor annars. KR er okkar hjartans mál og þess vegna er þetta alltaf jafn gaman,“ segir Bogi.

.